Fjögurra herbergja íbúð á tveimur hæðum í litlu fjölbýli á Fáskrúðsfirði.
Komið er inn í flísalagða forstofu með tvöföldum sérsmíðuðum fataskáp sem nær alveg upp í loft. Hiti er í gólfi í forstofu og inn af henni er lítil geymsla. Frá forstofu er komið á pall þar sem er teppalagður stigi upp á efri hæð og niður á þá neðri. Á efri hæð er stofa, eldhús og eitt svefnherbergi. Parket er á gólfi í bjartri stofu og þaðan er útgengt á rúmgóðar svalir með fallegu útsýni. Í eldhúsi er dúkur á gólfi og upprunaleg innrétting sem lítur vel út. Í svefnherbergi er dúkur á gólfi en þar var áður fataskápur sem hefur verið fjarlægður. Á neðri hæð er nýlegt parket á gólfi. Tvö svefnherbergi, baðherbergi og þvottahús er á neðri hæð. Annað herbergjanna er hjónaherbergi og þaðan er útgengt í afgirtan garð. Hitt herbergjanna er minna og nýtt parket er á gólfi beggja herbergja. Baðherbergi var gert upp fyrir ca 6 árum og þar eru flísar á gólfi og veggjum, baðkar með sturtu og innrétting. Hiti er í gólfi á baðherbergi. Þvottahús er með dúk á gólfi og tengi fyrir þvottavél og þurrkara, þar er einnig hitakútur. Inn af þvottahúsi er geymsla með máluðu, steyptu gólfi. Undir stiga á neðri hæð er einnig góð geymsla.
Skipt hefur verið um vatnslagnir inni í íbúðinni. Eins var skipt um ofna og settir olíufylltir rafmagnsofnar. Húsið er nýlega málað að utan.
Aðkoma hússins er snyrtileg en þar er bílastæði og hellulögð stétt. Þá er enn ein geymslan í bíslagi íbúðarinnar.